পুত্র-বোৱাৰীক বিচাৰি আৰক্ষীৰ অভিযান

শিৱসাগৰ:  অপ্রত্যাশিতভাৱে তিনিদিনৰ পূর্বে অসমৰ নাট্যজগতৰ এগৰাকী সুদক্ষ নাট্যকাৰ, অভিনেতা ৰজনী খাৰঘৰীয়াই আত্মহনন আৰু তেওঁৰ পত্নী ৰুবী খাৰঘৰীয়াৰ অস্বাভাৱিক মৃত্যুৰ পিছত সমগ্র ঘটনাই এক নতুন মোৰ লৈছে৷

ছুইচাইড ন’টত ৰজনী খাৰঘৰীয়াই নিজৰ একমাত্র পুত্র সন্তানক জগৰীয়া কৰি কেইবাটাও খামত পৃষ্ঠাই পৃষ্ঠাই মনৰ বেদনা, দুখ, পুত্রই কৰা চূড়ান্ত অৱহেলাৰ কথা ব্যক্ত কৰি গৈছে৷ সমগ্র ঘটনাটোক গুৰুত্বসহকাৰে লৈ শিৱসাগৰ আৰক্ষীয়ে তদন্তৰ গতি ক্ষিপ্র কৰি তোলা বুলি জানিব পৰা গৈছে৷

মঙ্গলবাৰে তদন্তকাৰী বিষয়াই আদালতত পাঁচটাকৈ বন্ধ খাম, এখন বগা চাদৰৰ দুটাকৈ টুকুৰা আৰু এটা ম’বাইল হেণ্ডছেট জব্দ কৰি আদালতত দাখিল কৰে৷ উল্লেখযোগ্য যে বন্ধ খামকেইটা এড্রেছ কৰা আছে ক্রমে– খাৰঘৰীয়া দম্পতীয়ে বসবাস কৰা আছুতীয়া পথৰ বাসিন্দা শ্রীমন্ত শর্মা নামৰ এজন ব্যক্তিলৈ৷

আন এটা খাম এড্রেছ কৰা হৈছে কনিষ্ঠ জী মণিকা খাৰঘৰীয়া গগৈলৈ৷ আন তিনিটা খামত এড্রেছ কৰা হৈছে ক্রমে–ভাৰপ্রাপ্ত আৰক্ষী বিষয়া আৰু সংবাদ মাধ্যমৰ দুই প্রতিষ্ঠানলৈ৷ আনহাতে, ৰজনী খাৰঘৰীয়াই চিঠিৰ যোগেদি অভিযুক্ত কৰি থৈ যোৱা পুত্র দেৱাশিস আৰু বোৱাৰী গীতাশ্রীক বিচাৰি তদন্তকাৰী বিষয়াই অভিযান অব্যাহত ৰাখিছে৷

ডিমৌ লাচিত নগৰত অৱস্থিত গীতাশ্রীৰ পিতৃৰ বাসগৃহত কালি অতর্কিতে আৰক্ষী গৈ উপস্থিত হৈছিল৷ কিন্তু আৰক্ষী হৈ পোৱাৰ পূর্বে দেৱাশিস-গীতাশ্রী সেই স্থানৰ পৰা পলাই যাবলৈ সক্ষম হয়৷ লক্ষণীয়ভাৱে দেৱাশিস-গীতাশ্রীৰ সন্তানটো গীতাশ্রীৰ মাতৃগৃহতে বর্তমানেও আছে৷  সংবাদ মাধ্যমৰ প্রতিনিধি উক্ত বাসগৃহত গৈ উপস্থিত হৈছিল যদিও পৰিয়ালটোৰ লোকসকলে ঘৰটো ভিতৰৰ পৰা বন্ধ কৰি কোনো লোককে সাক্ষাৎ দিয়াৰ পৰা বিৰত আছে৷

আমাৰ হাতত পৰা তথ্য মতে, খাৰঘৰীয়াৰ একমাত্র বোৱাৰীয়ে শিক্ষকতা কৰি থকা বিদ্যালয়খনৰ সমীপৰ জনসাধাৰণেও আন এক গুৰুত্বপূর্ণ সিদ্ধান্ত গ্রহণ কৰিছে৷ সেই অনুসৰি, কোনো কাৰণতে ভৱিষ্যতৰ দিনত গীতাশ্রীক শিক্ষকতা কৰিবলৈ উক্ত স্থানত দিয়া নহ’ব বুলি স্থানীয় ৰাইজে হুংকাৰ প্রদান কৰিছে৷ ইফালে সমান্তৰালভাৱে সেই একে সময়তে তেওঁৰ তিনিগৰাকী অৱস্থাসম্পন্ন বিবাহিতা জীয়ৰীয়ে পিতৃ-মাতৃৰ চিকিৎসা বা আন কোনো ক্ষেত্রত কোনোধৰণৰ খবৰ-বাতৰি ৰখা নাছিল নেকি বুলি যুক্তিপূর্ণ প্রশ্ন শেহতীয়াকৈ শিৱসাগৰৰ সকলোৰে মুখত সর্বত্রে চৰ্চাৰ বিষয় হৈ পৰিছে৷

পিতৃয়ে কেৱল একমাত্র পুত্র সন্তানক যে জগৰীয়া কৰি ইহজগতৰ পৰা মেলানি মাগিলে, তাকো লৈ ক্রমান্বয়ে অধিক ৰহস্য ঘনীভূত হৈছে৷ পুত্র হিচাপে মাক-দেউতাকক শুশ্রূষা কৰা, ভৰণ-পোষণ দিয়া যিমান দায়িত্ববোধ আছে সমান্তৰালভাৱে তেওঁৰ বিবাহিতা তিনি কন্যা সন্তানৰো দায়িত্ব নাছিল নেকি বুলি ৰাইজে প্রশ্ন উত্থাপন কৰিছে৷ ৰজনী খাৰঘৰীয়াৰ পৰিয়ালটোৰ দেৱাশিস আছিল আটাইতকৈ সৰু৷

জীৱনত কোনো দিনাই গুৰু দায়িত্ব মূৰ পাতি নোলোৱা বা লোৱাৰ অভ্যাস নাছিল দেৱাশিসৰ৷ বিশেষকৈ দেউতাক ৰজনীয়ে পুত্র দেৱাশিসক বিভিন্ন সময়ত তেওঁৰ সমস্যা আৰু অসুবিধাসমূহ অৱগত কৰে যদিও দেৱাশিসে যেন বিশেষ গুৰুত্ব নিদিয়ে সেই কথা পিতৃ-মাতৃয়ে অনুভৱ কৰিছিল৷ এক তৃতীয় শক্তিৰ উচটনিত দেউতাকৰ মনটো দেৱাশিসৰ প্রতি বিদ্রোহ কৰোৱাইছিল নেকি?

শেহতীয়াকৈ এনেবোৰ ৰহস্যময় প্রশ্নৰ উত্তৰে সমগ্র ঘটনাটো অধিক ৰহস্যৰ মাজলৈ ঠেলি দিছে৷ আনহাতে, আজি ৰজনী আৰু ৰুবী খাৰঘৰীয়াৰ মৃত্যু হোৱা তিনিদিনৰ পিছত শিৱসাগৰ আছুতীয়া পথত থকা ভাৰাগৃহটোত তিনি বিবাহিতা কন্যাৰ উপস্থিতিত ধর্মীয় ৰীতি-নীতি পৰম্পৰাৰে অনুষ্টুপীয়াকৈ তিলনী কার্য সম্পন্ন কৰে৷ সমান্তৰালভাৱে আজি একেদিনাই দীর্ঘদিন ধৰি ভাৰা হিচাপে থকা ভাৰাগৃহটো পৰিষ্কাৰ-পৰিচছন্ন কৰি ভাৰাঘৰৰ মালিকক কোঠাটো চমজাই দিয়ে তিনি কন্যাই৷

ইয়াৰ উপৰি দেউতাকে জীৱনত এপদ-দুপদকৈ গোটোৱা অনেকবোৰ ব্যৱহূত সা-সম্পত্তি বাঢ়ৈটিঙত থকা বৰজীয়ৰী মৃদুস্মিতাৰ বাসগৃহলৈ লৈ যায় এখন ট্রাকযোগে৷ তিনি ভগ্নীৰ মাজত এক শোকাকুল পৰিৱেশৰ মাজেৰে মাক-দেউতাকৰ সাঁচতীয়া বাকচ, গডৰেজ খোলাৰ মূহূর্তত দেউতাকৰ অনেকবোৰ ব্যৱহূত সামগ্রী দেখাত হুকহুকাই কন্দাৰ লগতে স্মৃতিৰে আৱৰা কিছু বস্তু তিনি ভগ্নীয়ে লৈ যায়৷

অৱশ্যে ইয়াৰে কিছু ব্যৱহূত সামগ্রী নগৰৰ এখন অনাথ-আশ্রমক দান দিয়াৰ উপৰি এগৰাকী দৰিদ্র মহিলাকো দুই-এপদ সামগ্রী প্রদান কৰে৷ কিন্তু আজি এই পৰিৱেশত উপস্থিত নাছিল ৰজনী-ৰুবীৰ একমাত্র পুত্র দেৱাশিস আৰু তেওঁৰ পত্নী৷ মাক-দেউতাকৰ তিলনী অনুষ্ঠানত উপস্থিত নথকা ভাতৃ-বোৱাৰীৰ অনুপস্থিতিত অতি ক্ষোভেৰে বৰজীয়ৰী মৃদুস্মিতা গগৈয়ে আমাক জানিবলৈ দি ক’লে– সি অলপমান ভয় খাইছে৷ সৰুৰে পৰা সি আছিল আলাসৰ লাড়ু৷ মা-দেউতাই কোৱা কথাবোৰ সি সহজভাৱে লোৱা নাছিল৷ আৰু সি ভবাও নাছিল এনেধৰণৰ অভিশপ্ত এটা দিন তাৰ জীৱনলৈ আহিব বুলি৷